“قول يا قلبي” شعر لـ ميريت وصفي

“قول يا قلبي” شعر لـ ميريت وصفي

إيه جرالك قول يا قلبي

أنت ليه دايمًا مخبي

إحكي فضفض ع اللي فيك

كل شئ باين عليك

ولا يعني إكمني ساكت

فاكر إني مش بحسك

لا دا أنا بحس بيك

أيوه سامع نبض حسك

أيوه عارف اللي فيك

مهما هتداري عليا

حتى لو كنت بعينيا

مش بشوفك

بس حاسس بالدموع

قايدة نار بين الضلوع

والسبب مبقاش مهم

تنطفي كل الشموع

وسط ضلمة بقيت لوحدك

ماشي سكة كاسرة عِندك

والسنين عليك تعاندك

وأنت مكسور الإرادة

أعمى مش شايف سعادة

أصل جرحك أقوى منك

وأقوى مني كمان زيادة

وأعمل إيه؟

لسه نفسى مش لاقيها

والحياة قاسية عليها

لو عرفت إيه اللي فيها

كنت يمكن ألقى حل

أه بمل

من ظروف وسنين وناس

كل  شئ بقى ليها سهل

سهل تجرح.. سهل تدبح

سهل تكسر قلب يفرح

حتى لو فرحة قليلة

يقدروا بس في ثواني

يقلبوا نهاره ليله

ويرجعوه للحزن تاني

ويسيبوه وحيد قتيل

هو ده حالك يا قلبي

مهما هتحاول تخبي

أنت ميت.. فيك مبيت

كل أحزان السنين

بس قولي يا قلبى مين

حس بجراح الحزين

ولا كان في الجرح جنبي

قول يا قلبي

الوسوم