هاتعمل إيه لو شفت تحرش في العيد؟

هاتعمل إيه لو شفت تحرش في العيد؟ لا للتحرش

يحل غدًا الأربعاء عيد الفطر المبارك والذي يشهد خروج معظم الأسر والفتيات والشباب للتنزه ليبدأ معها موسم التحرش اللفظي والبدني في الشوارع والميادين والحدائق العامة.

ووفق دراسة نشرتها منظمة الأمم المتحدة عقب ثورة 25 يناير، فإن 99.3% من السيدات المصريات يتعرضن للتحرش.

نقدم لكم مجموعة من النصائح التي يجب اتباعها إذا رأيت واقعة “تحرش”:

إنك تتدخل بأي شكل من الأشكال لما تشوف جريمة تحرش جنسي بتحصل قدامك

  • لو أنت في مكان زحمة وشفت حد بيحاول يتحرش اقف في النص عشان تعزلهم “أو تفصل بينهم”.
  • لو قلقان من التدخل نادي على حد يساعد.
  • قول للمتحرش “اللي بتعمله ده مش مقبول هنا وأحسنلك تمشي”.
  • خد المتحرش على جنب وقوله “عيب اللي بتعمله ده”.
  • زعق في وش المتحرش وقوله “اللي بتعمله ده ما ينفعش”.
  • اعرض موافقتك على الشهادة في القسم.
  • حاول تشتيت المتحرش بسؤاله عن الوقت أو الاتجاهات.
  • صور المتحرش لو عرفت وافضحه.
  • اسألي المتحرش بها لو محتاجة مساعدة.

بلغ إدارة المكان لو شفت أو اتعرضت لتحرش جنسي من أحد الموجودين.

ماتسكتش – أعمل اللي أنت شايفه مناسب للموقف.

  • رد واتكلم بصوت عالي وقول لأ لو اتعرضت أو اتعرضت بنت قدامك للتحرش، ممكن برضه تطلب المساعدة من الناس اللي حواليكي في الشارع.
  • ابعت لخريطة التحرّش وقولنا إيه اللي حصل، أمتى وفين برسالة قصيرة على 6069، أو من خلال الإيميل أو تويتر أو على موقعنا أو الفيسبوك، كل التقارير اللي بتجيلنا مش بتظهر اسم المرسل.
  • اتكلم عن اللي حصلك مع أصحابك وعيلتك وقرايبك، أو اكتب على الفيسبوك وعلى تويتر، محتاجين كل الناس تعرف حجم المشكلة وإنها بتحصل لكل الستات والبنات اللي حواليهم.
  • استخدم الخدمات المجانية المتاحة من دعم نفسي ومساعدة قانونية، ممكن تتصل بنظرة للدراسات النسوية (01011910917) وتعرفي معلومات أكثر.
  • اعمل محضر في قسم الشرطة ده حقك وفي قوانين ممكن تستخدم لإدانة المتحرش، تابع الصفحة دي عشان تعرفي معلومات أكثر عن كيفية عمل   محضر، أو اتصلي بنظرة للدراسات النسوية (01011910917) للدعم القانوني المجاني

كل فعل إيجابي نعمله مهم

  • كل مرة تتكلمي فيها وتقولي لأ للمتحرش في حد حايشوفك ويفكر يعمل أو تعمل كده المرة الجاية، كمان المتحرش هيعرف إن ماحدش حايعديهاله بسهولة لو فكر يتحرش تاني.
  • كل تقرير بييجي على خريطة التحرّش هو دليل على حجم مشكلة الاعتداء والتحرش  في مصر، ده بيعكس قد إيه بيأثر التحرش في كل المجتمع، وإن فيه كتير مننا مش هيسكتوا بعد كده، التقارير اللي بتجيلنا مهمة وبتساعدنا في حملاتنا الإعلامية وفي نشاط التواصل المجتمعي.
  • كل مرة نتكلم على واقعة تحرش جنسي حصلت لنا أو لحد نعرفه، بنعرف الناس قد إيه المشكلة بتحصل لنا كلنا، وإن مش عيب نتكلم عن اللي بيحصل لنا وإن كل الناس ممكن تلعب دور في محاربة التحرش.

*هذه النصائح منسوبة لموقع “خريطة التحرش”

http://harassmap.org/ar

الوسوم