المسحراتي فؤاد حداد: بعلو حسي

المسحراتي فؤاد حداد: بعلو حسي فؤاد حداد

بعلو حسي

اصحى يا نايم

وحد الدايم

وقول نويت

بكره إن حييت الشهر صايم

والفجر قايم

اصحى يا نايم

وحد الرزاق

رمضان كريم

مسحراتي

منقراتى

وانا بنادي

بعلو حسي

الحق بين

ومصر أولى

حققنا ثورة

وقمنا صخرة

وعرقنا زين

أرض البطولة

إحنا اللى إيدنا

خلت حديدنا

حديد حنين

على الطفولة

وصباح مندي

على الولاد دي

طريقها هين

ما فيهش غولة

وأنا السنة دي

شقت سنابلي

فى كل وادي

والليل خطب لي

قمر زبادي

بسحر بابلي

وضي هادي

فردت حبلي

بطول بلادي

المشي طاب لي

والدق على طبلي

ناس كانوا قبلي

قالوا في الأمثال

“الرجل تدب مطرح ما تحب”

وأنا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحتة من بلدي

حتة من كبدي

حتة من موال:

أنا بلدى حره بنيت على غصنها عشي

ولقمة الحب بتفطرني وتعشي

أنا عاوز ابنى يعيش والظلم ما يعشي

يا رب ياللي خلقت لنا البصر واللمس

ولا ترسم الشمس إلا نور على وشي

إصحى يا نايم وحد الدايم

السعي للصوم خير من النوم

دي ليالي سمحة نجومها سبحة

اصحى يا نايم يا نايم اصحى

وحد الرزاق.

 

فؤاد حداد- 1964، من ديوان المسحراتي- الهيئة العامة للكتاب 2011

الوسوم