المسحراتي فؤاد حداد: التبات والنبات

المسحراتي فؤاد حداد: التبات والنبات الشاعر فؤاد حداد

التبات والنبات

اصحى يا نايم

وحّد الدايم

وقول نويت

بكرة إن حييت

الشهر صايم

والفجر قايم

اصحى يا نايم

وحّد الرزاق

رمضان كريم

 

مســحـراتي
مـنـقـراتي
صاحب مدايح
وموشحاتي
الله يسامح
زمن الشحاتة
كان سيفي طايح
سيف خردواتي
دلوقتي فالح
في مناوشاتي
كسرت جانح
ابن الذواتِ
علّقته سابح
خيال مقاته
وبقلب صالح
من غير شماتة
على القوالح
سهران وشاتي
قلت اللى رايح
غير اللى آتي
رمضانّا صابح
صابح ليلاتي
قال انت سارح
تشهد زيناتي
أنا بحر مالح
يحلى يوماتي
وانا ليلى طارح
عنب بناتي
وهلالى فاتح
بلد الزناتي
أنا قلت واضح
يا شوق حياتي
كل الروايح
هلّت جهاتي
والشر زايح
والخير مواتي
وله لوايح
ولقيت مطارح
لمّت شتاتي
عيشى فى تباتي
وفي نباتي
يا أم إبني
بحري وقبلي
الخير تقابلي
والمشي طاب لي
والدق على طبلي

ناس كانوا قبلي

قالوا في الأمثال:

“الرجل تدب مطرح ماتحب”

وانا صنعتي مســحـراتي في البلد جوال
حبيت ودبيت كما العاشق ليالي طوال
وكل شبر وحتة من بلدي

حتة من كبدي

حتة من موال:
عشنا وشفنا الكواسر انكسر نابها
وخبرتني بهية إن الغيطان أبهى
وبنتها في المدارس أوّله ونابهة
وعيوني قابلت عيون من كل خير نابها
أنا قلت يوم المنى اليوم اللي منّى جاه
وكان لى بيني وبينك يا قمر مناجا
الحمد لله عشت وقلبي غنى بها

اصـحى يانايموحّد الدايم
السعي للصومخيرٌ من النوم
دي ليالي سمحنجومها سبحة
اصـحى يانايميانايم اصحى  وحّد الرزاق

 

فؤاد حداد- 1964، من ديوان المسحراتي- الهيئة العامة للكتاب 2011

الوسوم