المسحراتي فؤاد حداد: أشواقي طارحة

المسحراتي فؤاد حداد: أشواقي طارحة فؤاد حداد

 

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتى
مـنـقـراتى
لا أنا بانظّر
بنظّاراتى
ولا باهزّر
ولا باهاتى
عدلت كيفى
مع الطاقيه
ولمحت طيفه
فى عيون نديه
وأمل حدفنى
أمل لقفنى
أنا آمالى
ما بتنتهيش
وأنا أمانى
فى سيف يمانى
لا عاد يجلّى
ولا عاد يطيش
ويا دنيا مَرْحَى
أشواقى طارحه
فى صدرى بُلبُل
جناحى ريش
والسد يعلى
والساقيه تملا
والناس تغنّى
والناس تعيش
طول عمرى زادى
المعجزه دى
مين اللى ينكر
ويقول مافيش
غمضت عينى
وفتحت عينى
العشه لبست
قزاز وشيش
وكنت حافى
ورميت لحافى
ورجلى مدّت
على الحشيش
والمشى طاب لى
والدق على طبلى

ناس كانوا قبلى

قالوا فى الأمثال:

“الرجل تدب مطرح ماتحب”

وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى

حته من كبدى

حته من موال:
صبح لنا حق نسعد بالحياه ديّه
وحق نحلم ونسعى لكل أمنيّه
واسألنى لابد قلبى يرد أغنيّه
يا اللى انت مش راح تخلى للأمانى سؤال

اصـحى يانايموحّد الدايم

فؤاد حداد- 1964، من ديوان المسحراتي- الهيئة العامة للكتاب

الوسوم